ზღვარი

გვამცნობს ინტერნეტ პროვაიდერი :
"ნაპოვნია ჰიქსის ბოზონი" .
ცერნი . ადრონული კოლაიდერი .
რამდენიმე ხვრელი ოზონის .
ვითამაშოთ დიდი აფეთქება,
ახალი კვანტური მეთოდით,
ნაწილაკის ნაწილაკზე დახეთქება .
"ადამიანურად" ვერთობით .
ვცდილობთ გავარღვიოთ დრო და სივრცე,
მინიატურული შავი ხვრელით,
"ტრანსჰუმანიზმი" ისე ავითვისეთ
უკვე "ადამიანობაც" აღარ გვშველის.
ნანო-ტექნიკის ბმულები,
ღვთის ხატის სუროგაცია,
მივიწყებული სიხშირე
ჰერცები და ვიბრაცია .
სიმების თეორია . მულტივერსი .
ხელოვნური ინტელექტი . ომი .
ფარდობითობის ეონები
სილუან ათონელი . აზიმოვი .
რელატივისტური ფიზიკა,
გადაულახავი ბარიერი,
თეორია . აბები . გაფრენა -
შინაგანი სამყარო ცარიელი .
სჭირდები,ვინც და რაც გინდა
აყირავებულ მსოფლიოს,
უსულო "სკამი" , "მაგიდა"
ნახატი - უპროპორციო . 
ირღვევა დრო და იმსხვრევა სივრცე,
იჭიმებიან სტიქიონები,
მარადისობით რომ ვერ განივრცნენ
ჩვენში ატომი და იონები .
უკვე წუთს წამი ვეღარ ეწევა,
და თითქოს სივრცეც განზე იწევა,
კაცობრიობის ძველი აკვანი
ალბათ,სულ სხვა გზით გადაირწევა .
დღემდე არნახული ღმერთის იუმორი,
ახალი ბაბილონის შენება,
რა მოხდებოდა,კაცობრიობას
უფლის ნებით რომ ენება ?
სიკვდილის ზოლი ჩვენშიც იჭრება,
წუთისოფელო - სიცოცხლეც დალბა . . . 
შენგან ნაშობ ხალხს უკვე დაგვეცა
ცივილიზაციური დამბლა !