მარტში ქუჩებს უეცრად ..

მარტში ქუჩებს უეცრად,
საუკუნო მეფეთა
ძველი აბობოქრებით 
ქარი შემოეფეთა.
ვინ ვიყავი?! ვიდოდი,
ღამის ბნელი რკალებით,
არუშორეს, გარდასულ
სველი თებერვალებით.
გული - ცეცხლის მოწამე, -
ვინც კი იყო პირველი,
ნაზი წვიმით ტიროდა,
მარტი - შესაწირველი.
გასაგონად ძნელია,
თუმცა ბევრი გვისმენდა,
სული ამდენ გოდებას
სიყვარულით ითმენდა.
წამის ელვით მოსული
ვინ რომელი სვიანი,
ბოლოს მაინც მტვერია,
ყველა ადამიანი.
კვლავ ღრუბელი, ბულულა,
(ღმერთო, რა გაათენებს)
ღამე - ჩემი დემონი,
ისევ არ მომასვენებს.
ო, ქარები ალერსით
ჩემს სულს შემოხვდებიან,
ვარსკვლავთ შორის, როდესაც
გზები გამოჩნდებიან.
მარტში ქუჩებს უეცრად,
საუკუნო მეფეთა
ძველი ახმოვანებით 
ქარი შემოეფეთა.
*
მიხეილ ქაშიაშვილი