* დედის სიყვარული არ იყიდება

- ბებო, რა ღირს ყვავილების თაიგული?

- ვისთვის გინდა?

- დედისთვის.

- ისე აიღე.

- ეგ როგორ, მჩუქნი?

- ჰო, რა მოხდა. ღმერთის მოყვანილია, ჩემი რა მიდის. მეც ღმერთის გაჩენილი არა ვარ და განა ვიყიდები?!

- ღმერთის მოყვანილი კი არის მაგრამ შენი დაკრეფილი ხომაა?! შენ კიდევ ასე იოლას ვერ გახვიდოდი. ერთი შეკვრა თაიგულის შესაგროვებლად ვინძლო რამოდენა მინდორს შემოივლიდი კრეფა-კრეფით... ეგ კიდევ შრომაა და შრომა ფული ღირს.

- დედისთვის მინდაო არა?

- ჰო, ჰო დედისთვის.

- ბიჭო, ჩემს შრომას რომ ითვლი, დედაშენს რაც ჯაფა ექნება შენზე გაწეული, ერთი თაიგულით გამოისყიდი?! 

- სიყვარულის არომატით მიმაქვს ბებო, განა უბრალოდ. შენ ფასი მითხარი. არ მინდა გუმანით გადაგიხადო, დაგაკლო და გული დაგწყვიტო.

-  აკი გითხარი ისე აიღე მეთქი, დედის სიყვარული არ იყიდება!

//მარიამ რევიშვილი//