სარფელი მეთევზე ბავშვების სიმღერა

აიდა, აიდა,
გასცურე, ბაიდა,
გამოდი, კეფალო,
გამოდი, სტავრიდა!

აიდა, აიდა,
მოუსვი, ბაიდა,
დელფინი მოვარდა,
ნეტავი საიდან?..

სტავრიდას გაიტანს,
კეფალსაც გაიტანს,
ბადეს და ბაიდას
გაიტანს ლაზისტანს.

ამ ბადეს დავტოვებთ,
ტალღებზე ეფინოს,
ოღონდ შენ მოგვეშვი,
კეთილო დელფინო.

რა მოხდა ასეთი,
ეს ზღვა რომ გაცალე;
სულ შენი არ არის?
ცოტა ჩვენც გვაცალე!

დღეს არა გვცალია,
ხვალ გეთამაშებით,
დილიდან ვთევზაობთ
სარფელი ბავშვები.

დღეს თევზის ნასახიც
არ გაგვიყიდია,
გვაცალე, გავყიდით
სტავრიდას, მიდიას.

ტალღები მოდიან,
ტალღები მოდიან,
შენ სხვაგან ითევზე,
შავი ზღვა დიდია.

მობრუნდი, ბაიდა,
მზე ზღვაში ჩავიდა.
დელფინი წავიდა,
აიდა, აიდა!