კეკეს

ვუძღვნი კესარია კუხიანიძეს, რომელსაც ვერ გავიგე, ცაზე რა უნდა?!


მეორე თვეა, ყოველ დღე ვამთავრებ რომანს, წერტილის დასმა მიჭირს.
და როგორც იქნა, რომ უკვე დავამთავრე თამაში მხიარულების,
და შევედი აბაზანაში, მამას ქაფით გავიპარსე წვერი,
გავედი გარეთ და ნოემბერში ზამთარი დამხვდა,
გავიფიქრე რომ დღევანდელი დღე გუშინდელზე უკეთესია.

გუშინ მენატრებოდა და თავი უბედურად მიმაჩნდა,
დღეს ბედნიერად მივიჩნიე თავი, რადგან მენატრებოდა.

სასიცოცხლოა, ვიღაც ახლა ძილის ნაცვლად,
შენზე ფიქრობს.

და გიწერს ამ ლექსს.